SALMU 112: ELOGIU DI LU GIUSTU

¹ Alleluia. Biatu l’omu ca timi lu Signuri e trova granni cuntintizza nei so’ cumannamenti. ² Putenti supra a terra sarà la so’ stirpi, la discinnenza di li ggiusti sarà bbiniditta. ³ Onuri e rricchizza ‘nta la so’ dimura, la so’ ggiustizzia rimane pi sempri, ⁴ spunta ‘nta li tenebbri comu luci pi li ggiusti, bbonu, misiricurdiusu e ggiustu. ⁵ Filici l’omu ca havi pietat,i ca da’ a prestitu dinari, amministra i soi beni cu lu sennu. ⁶ Iddu nun sarà strantuliatu in eternu, lu giustu sarà sempri rriguardatu. ⁷ Nun temerà nessunu annunziu di malannu, saldu è lu so’ cori, cunfida ‘nta lu Signuri. ⁸ Sicuru è lu so’ cori, nun havi scantu, finu a quannu avrà lu trionfu supra li soi nimici. ⁹ Iddu duna largu ali poveri, a so’ ggiustizzia rimani pi sempri, la so’ putenza acchiana ‘nta la gloria. ¹⁰ Lu empiu viri, si adira e si mancia lu ficatu, fa scrusciri li denti e si cunsuma. Ma lu disiu di li empi fallisci e mori annigatu cu lu feli.

Traduzione di Khaim Jehudà - Giovanni Ferdinando Giudice (di proprietà dell’autore)